top of page

Foa'i e Pastor Waita ma le Ekalesia Victory Power Ministry-NZ le $10,000 i le Samoa Victim Support.


Pastor Waita Fata ma le faletua Melody i le taua'a'aoina o le seleni $10,000 i le Peresetene Siliniu Lina Chang.


11 Setema 2023: E iai le 'upu ua laulauvivilu ai le atunu'u, e sili atu ona leotele galuega e faia ma le alofa nai lo'o galuega e fai va'ava'i mo le taui. E fa'apena le manulauti o lo'o taula ai pea le fa'alapotopotoga o le To'omaga mo e ua Puapuagatia, i le fa'amoemoe ia lavea'i so'o se tagata Samoa ua mana'omia se fa'amalu e malu ai mai le tele o sauaga ma fa'afitauli ua a'afia ai.


Aepeita'i o nei galuega alofa a le To'omaga e le'o fa'asi'ulaumata i sona taui po'o se totogi ae ona o le alofa tula'i lava o le atunu'u o lo'o gasolo ai pea i nofoaga ua avea ma fale fou o isi fanau e fia fesoasoani iai. Ma e fa'apena le tele o aso i le nofoaga lenei e pei fo'i ona iai le Aso Faraile 8 Setema 2023 lea sa afea ai e ni isi o Samaria agalelei ma ofoina atu iai le fesoasoani.

O le ta o le itula e 10am i le taeao na tau'a'aoina atu ai e le susuga le fa'afeagaiga ia Waita Fata ma le Ekalesia o le Victory Power Ministry i Aotearoa, Niu Sila se fesaosaoni tau seleni i le To'omaga mo e ua Puapuagatia ma sa talia aloa'ia ai e le susuga i le Peresetene o le fa'alapotopotoga ia Muli'aga Teli Siliniu Lina Chan.


O le agaga fa'agae'etia ma le talisapaia na fa'aalia e le Peresetene ma le komiti fa'atonu a le To'omaga ona o le agalelei ma le alofa tula'i a le atunu'u aemaise ai o le susuga i le ali'i faife'au ia Waita ma lana Ekalesia, ina ua afea le nofoaga o Fa'amoemoega(Campus of Hope) ma tu'u atu le latou tau'au e lagolago ai le fa'amoemoe a lenei fa'alapotopoto ua avea ma 'aiga o ni isi o fanau o lo'o sulufa'i iai mo se lavea'i ona sauaga sa feagai ai.


E tusa ma le $10,000 tinoitupe Samoa le a'ofa'i o le fo'ai a le faife'au ma le Ekalesia na tau'a'aoina ma le loto fa'afetai a le susuga i le faife'au ia Waita i le galuega fita o lo'o feagai ma Siliniu aemaise o le 'aufaigaluega atoa a le To'omaga ua mafai ona o latou apelepeleina ai fanau sulufa'i a Samoa ua le'o toe malu i o latou lava 'aiga moni.


Saunoa Ps Waita, o le afioga ia Siliniu Lina; o se tasi o agelu filifilia a le Ali'i mo lenei taimi e laveaiina fanau ua saili se nofoaga e to'omaga iai mai o latou fa'afitauli.




O le faiga pa'aga a le Ekalesia lenei ma le Samoa Victim Support Group e le fou nei, e pei ona fa'ailoa e Pastor Waita, ae ua ia manatu; o se taimi lelei lenei ua alagatatau ai ona fesoasoani ai i le latou galuega alofa o loo fa'atino ma tautua ai le atunu'u e ala lea i le toe aumai o fa'amoemoe o alo ma fanau ua talepeina ma fa'atoilaloina e sauaga i totonu o 'aiga.


Ma o lea, sa tu'ufa'atasia ai lenei meaalofa tau seleni e fesoasoani ai i vaega mana'omia e le fa'alapotopotoga mo le galuega lavea'i o lo'o fa'atino i le atunu'u aemaise ai o fanau.


Comments


bottom of page