12 Setema 2023: Ua la'a le Matagaluega o leoleo e fa'atino le latou galuega i matua o fanau o lo'o fa'atau savali oloa i luga o auala ina ia tau sa'ili se fofo mo fa'afitauli ua tula'i mai i nofoaga faitele e mafua mai o i latou nei.
O le maitauina pea e leoleo o fa'alavelave ua aaia ai tagata lautele i nofaoga faitele ona o tu ma aga a ni isi o fanau o lo'o fa'atino lea 'au'au i le atunu'u, o le ala lea ua le nofoa'i ai le Matagaluega ae fa'atino loa le latou galuega e ala i le va'ala'au o matua o nei fanau ina ia fa'atalanoa.
O le galuega a le Ofisa ua fa'atino nei, o le aga'i sa'o lava i matua e fa'ailoa ai ia mata'upu ae o le lapata'i fo'i i nei tu ma aga o lo'o faia e o latou fanau ua a'afia ai tagata lautele.
E mautinoa e fa'asalaina se matua ona o tulaga nei, aua le'o iai se tulafono fa'atonutonu e tapu ai pe fa'asa ona fa'atau oloa nei i auala ae o le mamafa lava e pa'u tonu lea i matua, aua o le latou lea galuega e tatau ona fa'atino.
Ua tele ripoti ua fa'aoo ane i le Ofisa o leoleo, ona o isi alo ma fanau o lo'o faia nei auaunaga ua tele ina fa'atupu misa i nofoaga faitele ma ua avea o se tulaga ua a'afia ai ma meatotino a tagata o le atunu'u.
I le saunoaga a le Sui Komesina ia Papalii Moanalisa Tia'i Keti, sa ia fa'ailoa le mamafa o le silasila a le Matagaluega i fa'afitauli nei ma soligatulafono ua alia'e mai i totonu o nofoaga faitele, ma o le ala lea ua 'ave ai se lapata'iga malosi lava i matua ina ia ia tautuana alo ma fanau ina ia 'aua ne'i tu'ufaua ma ia mautinoa le puipui mai i le ono a'afia i ni soligatulafono.