Ua lapata'ia e le Matagaluega o le Soifua Maloloina le atunuu ina ia tautuanā puipuiga mai i le fa'ama'i o le Fiva Ponaivi(Dengue Fever), ua maitauina le toe aliae mai.
I le pepa o faamatalaga a le Matāgaluega, ua aumai ai nei se lapataiga malosi ma faamaonia mai ai ni isi o tagata ua faamaonia mai i falemai le aafia ai i le fa'ama'i.
O le fiva ponaivi o se faama'i e mafua mai i le iniseti o le namu, o vaiarasi e feaveai e le namu mai le isi tagata i le isi tagata ma faapipisi ai i ni isi lava foi tagata.
E tatau i 'āiga ona saili vaega o loo tautuufua ai namu, ma o namu e ola ma tautuufua i nofoaga e iai vaivai to'a, aemaise lava totonu o atigipa'u, pesini vai, tane vai ma isi vaega e iai suavai.
Ma e tatau ona faamamā ia vaega, ina ia taofia le pipisi o le fiva ponaivi e feaveai e namu.
O aafiaga o lea fa'ama'i, e vevela ma fiva le tino, faasuati, pata le tino ma e oo ai lava i se tulaga tigaina ma maliu ai lava.
O loo fautuaina malosi ai e le Soifua Maloloina tagata uma ina toaaga e taumafa le vai mamā ma le fai o se ofu e ufiufi ai le tino atoa.