top of page

“Leai se MEA’AI; ua leai se OLA” La’auli’alemalietoa.

1 Tesema 2022.



O le Aso Lulu 30 o Novema 2022 na tapunia ai le fonotaga a Atunu'u Tau Atia'e a le Pasefika i vaega tau i Taumafa ma Fa'ato'aga i le sa'ilia o fofō mo nei vaega.


E tolu aso o lea fonotaga e pei ona talimālō ai Sāmoa lea na fa'ataunu'uina i le Faletalimālō a le Tanoa Tusitala Hotel.


O le 'auga lava ma le fa'amoemoe 'autū o lenei fonotaga ina ia fa'amalosia lava tulaga o le saogalemū mo taumafa ma vaega o fua fa'ato'aga auā le fofoga taumafa ma le 'auina atu i fafo ia tatou maketi.


I le taualuga ai o lea fonotaga na saunoa ai le afioga i le Minisitā o le Matāgaluega o Fa'ato'aga ma Faigafaiva ia La'aulialemalietoa Polata'ivao Fosi Schmidt.


I le saunoaga a le Afioga ia La'auli e tapunia ai le nei fa'amoemoe, na ia fa'afetai ai pa'aga na galuelue fa'atasi e fa'atupeina lenei fonotaga tāua mo le Pasefika ma ona atumotu tau atia'e.


Na saunoa La'auli i le tāua o le fono lenei, ua maua ai avanoa lelei e fegalegalea’i ai le tasi ma le isi ae o le tele fo'i o mea ua mafai ona maua mai ai ma a’oa’oina, ma o lona naunauta'iga ina ia faaauau pea lea fegalegaleaiga ma ia o'o i se tūlaga loloto talanoaga i le tāua o nei taumafaiga 'uma.


O le Agrifood Systems o lo'o fafaguina o tatou atunu'u o le Pasefika i le mea moni e tatau ona tatou galulue fa'atasi e suia le auala tatou te gaosia ma fa'atino ai le fa'agaioi ina o le tausisia lelei lea o 'oa o le nātura o lo'o maua ai taumafa.


Saunoa La'auli, "Talu ai e mafai e faigā taumafa ona tu'ufa'atasia i tatou o nu'u ma tagata, e mafai fo'i ona fa'apotopotoina i tatou i le sa’ilia o ni fofō talafeagai."


O le tu'ualalo fo'i a le Minisita i ta'ita'i o le Pasefika, ina ia maua le lotogatasi ma tutū fa'atasi.


Hon. La'aulialemalietoa Polataivao Fosi Schmidt (Minister of Agriculture and Fisheries.)

"O lea la, ina ia mafai ona tatou taumafai uma i le suiga o le tatou Agrifood Systems, e tatau ona tatou tutu faatasi e lagolago le tasi i le isi faatasi ai ma le fesoasoani ma le lagolago mai a tatou paaga mo atinae. E pei ona fai mai se tasi o muagagana,- "O le galue to'atasi e itiiti mea mafai ona fai 'ae o le tutu fa'atasi o le 'a mafai ai ona tatou faia o mea e tele".


E iai le talitonuga a le afioga i le Minisita o Fa'ato'aga a Samoa, e tāua tele le galulue so'oso'o tau'au o atumotu o le Pasefika mo se tulaga lelei o fefa'ataua'iga o tatou ‘oloa ma fua o fa'ato'aga.


"E i ai le lelei o le fefa'ataua'iga i le va o atunu'u atumotu, e le gata i oloa ae fa'apea fo'i auaunaga."


Na toe fa'atepa lava foi le ‘au fono i vaitaimi o le a'afiaga tele na feagai ma fa'ato'aga ona o fa'ama'i mafua mai i fa'amai ma isi tūlaga ona o le leai o se taimi tele e maua, e toto'a ai le va'ai a le Faifa'ato'aga po'o le failafumanu ma isi atina'e i le tāua ma le saogalēmū o nei atina'e ese'ese.


Ae e le gata i lea, o le a'afiaga na a’afia ai ola ma soifua o tagata ona o ni isi o fa'ama'i ma ma'imau ai soifua.

"E ui ina maliliu le to'atele i fa'ama'i ma a'afia ai fo'i le soifua maloloina, 'ae o le mea mata'ina o le toe 'aumai lea fa'atasitasi o tagata ona o le malosi lea o taumafa. Auā fo'i o TAUMAFA o le totogugālēmū lenā o le tele o mea ma soifua, o se pisinisi a tagata uma' A leai se Mea'ai ua leai se ola"


Na taualuga le saunoaga a le Minisitā i le Fa'afetai i le fa'alapotoptoga a Mālō Aufa'atasi le F.A.O ona o le tu'ufa'atasia pea o nei fonotaga taua ma le finauina lava o matā'upu nei e fa'atalanoa ina i le lalolagi.

157 views

Comments


bottom of page