O le Aso Faraile 20 ma le Aso To'ona'i 21 o le masina lenei o Oketopa na fa'ataunu'uina ai se tauvaga tele fa'amalositino a le faletoleni o le Fatutoa Crossfit Gym ua fa'aigoaina o le Toa Games.
O le Aso Faraile na amata ma tatalaina ai lenei ta'aloga i le malae ta'alo fa'avaomalo o Samoa le Apia Park, i le sauniga lotu na saunia e le afioga Patele Tuimavave ma le saunoaga aloa'ia na tatalaina ai lea fa'amoemoe na tapenaina e le sui fa'avae o le faletoleni a le Fatutoa, ae o le tua'a fo'i o le ali'i Pule ia Brandon le afioga ia Fanene Etuale Sefo.
E fetaui le maua o le masele i lea aso, ae amata loa ta'aloga nei i le aso muamua, sa va'aia le finau o 'au uma e 26 lea na 'auai i le tauvaga i lenei tausaga. O se tauvaga tele lenei talu ona amata mai ta'aloga o le Toa Games i le tausaga e 2016.
O le tauvaga o lenei tausaga, ua mafai ona 'auai mai ai ni isi o 'au tauva mai faletoleni(gym) eseese i Niu Sila ma Ausetalia e pei ona iai 'au e 4 mai Ausetalia ma le 'au e tasi mai i Niu Sila, 7 'au mai i Amerika Samoa ma 'au e 14 mai i faletoleni ese'ese i Samoa.
O le aso muamua i le Apia Park, sa fa'atuanu'uina ai ta'aloga tamo'e, ae o le aso lona lua na fa'amae'a ai i ta'aloga si'isi'i mea mamafa i le faletoleni a le Fatutoa i Vaitele Tai.
O le taualuga o lea tauvaga tele na sola uma ai ma 'au mai Ausetalia le siamupini o le nei tausaga, o le 'au o le Sifi Ao na manumalo i le vaega o le Scaled ae o le RX sa manumalo ai le isi 'au o le Fia Ola.
O le Sifi Ao ma le Fia Ola o 'a uma e lua mai i le faletoleni i Brisbane Ausetalia e ta'ua o le Gym F4LRXD.
Sa fa'afetaia e le Komiti o le ta'aloga lenei 'au uma na 'auai aemaise ai lava o 'au fou na mafai ona lesitala ma tauva i lea tauvaga tele i lenei tausaga 2023.
O le fa'amoemoe o nei tauvaga a le Fatutoa ina ia su'e ai le aoga o toleniga fa'amalositino o lo'o gapatia ma faletoleni ta'itasi aemaise fo'i o le fa'aosofia o tagata ma talavou ina ia tumau pea ona toleni mo le soifua maloloina o le tino ma le mafaufau aemaise lava o le tali ma tete'e atu i fa'ama'i le pipisi.
Results:
Scaled Division.
Team Sifi Ao (Gym F4LRXD, Brisbane Australia).
Team Onosa'i (FRLXD, Brisbane Australia).
Team Scaled Never Fail(CF Fatutoa).
RX Division.
Team Fia Ola(F4LRXD, Brisbane Australia).
Team Nafanua Ta Fesilafa'i (CF Fatutoa).
Team Zero Rucks (F4LRXD Brisbane Australia).