11 Setema 2023: O le taeao o le Aso Gafua 11 o Setema 2023 ua molimauina ai le toe fa'aauauina ona faia o poloka a Malu o le Malo i 'auala e mata'itu ave ta'avale e le'o mafai ona o latou usita'i le saoasoa o lo'o fa'atulafonoina e tatau ona alu ai le ta'avale i totonu o Samoa.
O se tasi o nei poloka a leoleo o lo'o fa'atunu'uina lea i Vailoa, sa maua ai e leoleo ta'avale ua soli maila fa'atulagaina ma taofia ai. O le taofia ai e leoleo o aveta'avale ma ta'avale pe 'afai ua sili atu lona saoasoa i maila fa'atulafonoina, ona tu'uina atu lea iai e leoleo pepa fa'asala mo le soligatulafono i luga o le 'auala.
I le fa'atupula'ia ai pea o fa'alavelave tau ta'avale afi i luga o auala, o le tasi lea o fa'amoemoe maualuga a le Komesina ma le Matagaluega o leoleo e ala ai ona fa'atino pea nei galuega mata'itu i vaega ese'ese o le atunu'u.
I le tulafono o ta'avale afi o lo'o manino ai saoasaoa fa'atulagaina e tatau ona alu ai se ta'avale i vaega ese'ese o Samoa. I nofoaga e iai a'oga, falesa, pe 'a lata i vaega o lo'o iai nofoaga ma fa'ailoilo mo kolosi, vaega e iai auala laupapa, luma o fale fa'amasino po'o se taimi fo'i o lo'o saofa'ia ma usu le fono a le Palemene i uma o le fale fono e tatau ona alu le ta'avale i le saoasoa e tusa ma le 15 maila i le itula.
O nofoaga i le taulaga e tatau ona 25 maila i le itula ae o tua po'o fafo atu ma le taulaga e 35 maila i le itula le saoasaoa e tatau ona iai.
E le'o 'asa se vaiaso ma le tula'i mai pea o fa'alavelave tau ta'avale afi ma i sa'iliga a leoleo e fa'amauina ai le ova atu o le saoasaoa ma maila po'o kilomita e tatau ona iai.
O le Matagaluega o leoleo i le vaega o ta'avale afi lea o lo'o feagai nei ma le mata'ituina o nei soligatulafono i luga o auala.