Ua māe'a ona sainia se maliega i le vā o Samoa ma le mālō o Ausetalia e tauala mai i le Komesina Maualuga o Ausetalia i Samoa ma le Minisitā o le Matāgaluega o Tupe a Samoa.
O lea maliega ua fa'ataoto ai le fuafuaga a Ausetalia e fa'aaopoopo le isi $20 miliona talā Ausetalia e tusa lea ma le $36.7 miliona pe 'ā faaliliuina i le tupe Sāmoa.
O lea paketi fa'aaopoopo o le 'ā fa'amalosia atili ai tapenaga mautū a Samoa ina ia sao ma uli lana taligamālō tele.
O le susuga i le Komesina Maualuga o Ausetalia i Samoa His Ezcellency William Robinson ma le Minisitā o Tupe ia Lautimuia Uelese Vā'ai sa sainia lea maliega.
O le $20 miliona Ausetalia lenei e fa'aaopoopo atu lea i le $50 miliona Ausetalia sa sainia i le tausaga ua mavae 2023 e le Komesina Maualuga talu ai a Ausetalia o Emily Luck.
O le agaga faafetai a le Mālō o Samoa na faaleoina e le Minisitā o Tupe ia Lautimuia Uelese Vā'ai, i le mālō o Ausetalia i le galulue soosoo tau'au ai pea fa'apā'aga auā tapenaga o le fonotaga a le CHOGM.