5 Tesema 2022
Ua ma'ea ona fa'ailoa mai nei e le Ofisa o Fa'alavelave Tutupu fa'afuase'io e tauala mai i se fa'asalalauga fa'apitoa; le toe fo'i ai lea o Samoa i le tulaga saogalēmū e pei ona sa mata'ituina i le taeao o le Aso Gafua 5 o Tesema 2022; ina ua lapata'ia fautuaga mo le nofo sauni i se Tsunami.
I le saunoaga a le Afioga i le pule o le Ofisa o Va'ai Tau a Samoa ia 'Afa'ese, ua fa'amanino mai ai vaega ese'ese po'o la'asaga ta'itasi fa'avā'aitau mo le nofo sauni ai o tagata.
Sa fa'ailoa fo'i e Afa'ese, le toe fa'aleaogāina uma ai o fautuaga ma lapata'iga sa tu'uina mai muamua ma o lea fo'i ua saogalēmū femalagaina i le gataifale e pei ona iai ia malaga va'a i le va o Savai'i ma Upolu ma e fa'apēnā fo'i i le ‘au fagogota.
Ua fautuaina e le ‘Ofisa o Fa'alavelave Tutupu fa'afuase'i le atunu'u ina ia to'a pea i taimi uma.
O le taeao nei fo'i na tu'uina mai ai se fa'asilasilaga a le Komisi e pulea Tagata Faigaluega a le Mālō; le tu'uina mai a lea i Ofisa Sili o Matāgaluega le faitalia e tapunia ai se Ofisa po’o galuega a se Matāgaluega e fa'aaogaina ai aiaiga mo fa'alavelave tutupu fa'afuase'i ae se'i vagana ai ia auaunaga mana'omia (essential services).