top of page

O lo'o taofia pea Sam ma lona toalua e talia le aso 20 o Fepuari e tula'i ai i le fa'amasinoga.


Ua fa'amaonia mai e le afioga i le Komesina o le Matagaluega o Leoleo ia Auapa'au Logoitino Filipo, o lo'o taofia nei i lalo o le va'ava'aiga a leoleo le susuga ia Sam ma lona faletua o Sivai, e talia le aso 20 o Fepuari e valaauina ai le mata'upu.


Saunoa le Komesina i le feiloaiga ma tusitala, o lea ua toe tatala i tua le tamaitai o Lise Marie Schmidt lea na taofia fa'atasi mai ma Sam ma lona Toalua ae e fa'aaauina pea ona taofia le ulugalii nei ona e iai ni isi o la'ua moliaga fa'aaopoopo o lo'o faia iai suesuega a leoleo.


O Sam, Sivai ma Lise na taofia mai e leoleo i le Aso Faraile na te'a nei a'o aga'i atu i le la Loia i le fogafale ono i Tamaligi.


O le mata'upu lenei na afua mai ina ua molimau Sam i luga o le Blutv i le tausaga ua te'a 2023, ma ia fa'apea o ia e na te silafia lelei le tagata na tupu ai le fa'alavelave lea na maliu ai le susuga ia Tuuau Fa'asavalu ia Aperila o le tausaga e 2021 i Vaitele.


Na fa'ailoa fo'i e Auapa'au lona te'ena ai o ni fa'amatalaga e fa'apea ua iai ni faila ua misi mai ma le Ofisa o leoleo e tusa o nei mata'upu.


E le'i fa'ailoaina e le afioga i le Komesina o Leoleo ia ni isi o moliaga lea o le 'a fa'aopoopo atu i le susuga ia Sam ma Sivai, ae o Lise o lo'o ua molia i lona taumafai e fa'alafi le susuga ia Sam.


3,035 views
bottom of page