6 Oketopa 2022
O se tusitusiga na faia luga le Api o Foliga (Facebook) e Letelemalanuola Tuitofa Moe Penn e faapea e to'aono ni talavou pasefika i Niu Sila na o latou osofa'ia le falesa o le Ekalesia Fa'apotopotoga Kerisiano i Samoa i le pitonu'u o Magele a'o le taimi tonu lea olo'o feagai le a'oga Aso Sa ma le autalavou i a'ogamea ma tapenapenaga mo le lotu tamaiti.
I se molimau ‘ase tasi o tatou pa’aga fa’amoemoeina, e fa'apea na savavali atu nei taulele'a ma tutū i luma o le pa o le falesa lenei ma vala'au tagata ma fanau o lo’o i totonu e omai i fafo.
O lenei vaega o alii talavou o lo'o fa'aa'upegaina i ni meafaigaluega kamuta e pei o 'ili lima, aga'ese, fana fao ma samala, o le faamoemoe o le aualii ina ia oso atu i le pito i tua o le falesa peita'i na ta'u iai e faiaoga Aso Sa, e le mafai ona o atu i totonu ona o lo'o loka ma o lo’o iai le pa uaea o lo'o si'o ai le falesa.
Ina ua le mafai ona aga'i atu i totonu, sa faapena ona latou fa'aleagaina ai loa ma pou o le falesa i aga'ese ma 'ili laupapa, ma o latou fa’aleagaina ai se ta’avale a se faia'oga Aso Sa i le samala.
O fanau e i le va o le 1 i le 25 tausaga ua fefefe ma fetagisi leotetele ona o nei va'aiga e pei ona fa'atinoina e taulele'a nei Pasefika.
Comments