By Lauano Demetrius Ah Mau.
E le asa lava se ta’amilosaga si’isi’i uamea mamafa e auai atu ai le au si’isi’i a Samoa e tali mai lava i le fa’aeaina e ala i le maua ai o pine auro, pinse siliva, pine apamema ae le gata i lea o le fa’atuina o matati’a fou ma numera tasi ai Samoa i le Pasefika i lea fo’i ta’aloga.
Ua fa’amanuiaina fo’i taumafaiga a le alo o Samoa sa tauva ma tausinio i le ta’amilosaga si’isi’i uamea mamafa a le lalolagi o lo’o faia i Thailand le susuga ia Don Opeloge sa pine siliva mai ai i ole vaega o le 102kg le mamafa. E le gata ina fa’aopopo ai o pine a Don Opeloge ae ua ia tata’eina ai ma le matati’a o le Taupulega ma le Itulagi(Commonwealth/Oceania) o se tulaga
maualuga ua ausia ma ua faafiafiaina ai le pulega o le Fa’alapotopotoga o si’isi’i uamea mamafa a Samoa mo Don Opeloge a’o fa’asauni ma tapenapena atu ai i ta’aloga o le Olimipeka i Pale i Farani i le tausaga lenei, o lo’o i lalo o le ta’ita’iga a le susuga ia Tuaopepe Jerry Wallwork o le faiaoga ulu fo’i lea.
Momoli le loto fa’afetai a le Fa’alapotopotoga SI’isi’i uamea mamafa a Samoa i le tapuaiga ma le lagolagosua a le atunu’u fa’apea nisi o pisinisi o lo’o so’oso’o tauau e fesoasoani i le fa’amoemoe o alo ma fanau o lo’o tauva i ta’amilosaga si’isi’i uamea mamafa.