top of page

Polokalame fa'apitoa o le Ipu o le Lalolagi i le gagana Samoa ma sui tuai logologoā a le Manu Samoa.

O se polokalame o ta'aloga muamua i le gagana Sāmoa ua fa'asalalauina i luga o le ala ata a le Blutv ua faaigoaina o le Talanoa Sports, ua tuufaatasia ma le faamoemoe e faatalanoa ai le lalolagi o ta'aloga e lē gata o atinae o taaloga i Samoa ae o atunu'u i fafo.


Ae i lenei polokalame ua tatala aloa'ia i se polokalame fa'apitoa ma fa'asoa a ni isi o sui tuai logologoā a le Manu Samoa sa ta'a'alo i ipu o le lalolagi o le 1991, 1995 ma le 1999.


O le afioga ia Aumua To'o Vāega, Tole'afoa Andy Aiolupo ma Matamua Filipo Sā'ena; o ni isi nei tamāli'i logologoā a le Manu Samoa sa iai ua mafai ona fai ma sui o le polokalame lenei.

I le 3 vaiaso talu ona amata lenei polokalame i le ala fa'asalalau a le Blutv i le lalolagi, ua maitauina le to'atele o tagata o loo latou maimoaina, ona o se polokalame ua toe talatala mai ai ato ponapona o nei tamāli'i i o latou vaitaimi i taaloga lakapī ao fai ai foi ma sui o le Manu Samoa i ipu o le lalolagi.


O le uluai ipu a le lalolagi a Samoa i le 1991 na o'o ai ana taumafaiga i se tulaga maualuga ma o le vaitaimi foi lenā o talavou nei tamāli'i o le atunuu.


O le tu'ufaatasia ai o lenei polokalame, ua mafai ai ona faasoa tamālii nei i isi ipu o le lalolagi sa auai ai Samoa i tausaga ua tuana'i ae o le itū tāua o le lagolagoina o le tapua'iga a le atunuu mo lana Manu Samoa ao alo atu ai i le Ipu o le lalolagi o lenei tausaga o loo faia i Farani.


I lenei lava polokalame ma faasoa e maua ai foi avanoa e faasoa mai ai ni iuga o taaloga o le ipu o le lalolagi ua faagasolo nei i Faranai ma isi lava faamoemoe tau taaloga o loo auai ai alo ma fanau o le atunuu i totonu lava o Samoa ma fa'avaomālō.


O le fofoga o le Polokalame o le Fetalaiga ia Asiata Pio Vaoliko, ma e faasalalauina lea i Aso Gafua o vaiaso taitasi i le itulā e 5pm i le afiafi.


O le taaloga muamua a le Manu Samoa i le ipu o le lalolagi e taaalo ai ma Chile ua faatulaga i le Aso Sa 17 Setema 2023.


Comments


bottom of page