top of page

Sa'ili pea mea pu'eata a le TV show o le Survivor.

21 Setema 2022

PC: Google Survivor


E le'o māmā i le ofisa o leoleo ma le matagaluega le su'esu'ega o ni mea faigaluega e pu'e ai ata o se tasi o polokalame lauiloa mai Ausetalia ua fa'aigoaina o le Survivor lea na to'esea mai i nofoaga sa pu'eina ai nisi o vaega o lenei polokalame i Upolu.


O le vaiaso ua tuana'i na taunu'u ai ile ofisa o leoleo lenei mata'upu ma faagasolo ai loa su'esu'ega a le matagaluega.


E o'o mai i le taimi nei e le'i mafai lava ona maua le tagata ua oso ma nei mea faigaluega taugata lea e silia ma le sefulu afe tala o le tupe Ausetalia lona tau.


O le nu'u o Togitogiga, Siumu ma le aga'i atu i le atu Falealili, o nisi nei o nofoaga o lo'o pueina ai lenei polokalame ma o lo'o iai le fa'amoemoe e fa'amae'aina i le vaiaso lenei ma iloa ai le tagata o le'a manumalo i le ta'aloga po'o lea polokalame lauiloa.



O lenei polokalame o lo'o fa'apa'aga ai le fale pu'e ata tifaga mai i Ausetalia ma le malo o Samoa e tauala atu i le Ofisa o Tagata maimoa mai poo le ofisa o Turisi.


O se polokalame ua tele lava lona sao i le fa'alauiloaina lea o laufanua matagofie o Samoa aemaise lava o nuu ma afioaga oloo iai nofoaga o lo'o fa'aaogaina e pue ai lenei polokalame.


O se polokalame e faitau selau foi latou seleni o lo'o ua sasa'a mai i Samoa i lona atina'e turisi e pei na iai faletalimalo o lo'o api ai.


E ui lava la i le matagofie o lo'o momoli atu i lenei polokalame 'ae ua manatu i le mataupu ua tulai mai o lo'o faia iai suesuega a leoleo o le'a momoli atu ai ma se tala'ave le matagofie i le lalolagi.


I le tula'i mai ai o lenei mata'upu e ono fa'ailoga fesili ai ma le toe maua e Samoa o nei avanoa e toe pu'e ai ni polokalame fa'apenei.


O lo'o faagasolo pea sa'iliga ma suesuega a le matagaluega o leoleo ina ia toe maua nei meafaigaluega, ma o lo'o iai foi ma le talosaga a le matagaluega mo so'o se isi lava e silafia se tagata e nate fa'atauina atu nei oloa ia fa'apena ona fa'afeso'ota'i vave le ofisa o leoleo i le numera telefoni 22222.



Comments


bottom of page