top of page

Sa'ilia e leoleo le tagata o fealua'i ma le fana i le taavale na ia fanaina le vae o le taule'ale'a sa savali i le 'auala.

O le po o le Aso Toona'i 16 Mati 2024, na tulai mai ai se matā'upu i Sinamoga pe tusa o le itulā e 11pm, lea na a'afia ai se talavou 21 tausaga le matua ina ua lavea i se pulufana na fanaina mai e se tagata i luga o le taavale.


O le vaega tonu o loo iai le kolosi i Sinamoga na tulai mai ai lea faalavelave, e le'i mautinoa po'o le ā se mafuaaga na afua ai ona fa'apā e lea tagata sa malaga atu i le taavale le lā'au malosi ma faamanualia ai le taulealea 21 tausaga.


Ua fautuaina ai nei e le Ofisa o Leoleo, soo se isi e tau silafia ni faamatalaga e uiga i lea tagata sa faia lea soligatulafono, e tatau ona faailoa ane e fesoasoani i sailiga a le matāgaluega.


E tusa ma le faamatala mai i le Matāgalueg, o le ituaiga taavale o le VANGUARD lanu uliuli ma o le numera o le taavale e amata i le mataitusi 'R' ona e lei māua lelei e i latou na molimauina lea faalavelave isi numera o le ta'avale.


"O loo tau sailia nei ni fa'amatalaga i se taavale ituaiga VANGUARD lanu uliuli. O le numera o le taavale e amata i le R 5 ma e lei maua e i latou sa iai isi numera mulimuli o le plate number".


"Soo se tasi na te silafiaina lenei taavale poo ni fa'amatalaga foi i lenei taavale ma le avetaavale fa'amolemole fa'afesootai mai le Ofisa Suesue Fa'apitoa i le numera 22 222 laina 1100, 1101, 1102, 1106 poo le imeli mai foi i le tuatusi - commissioner.sec@police.gov.ws".


O loo taofia nei i Motootua i le maota gasegase le taule'ale'a na faamanualia lona vae i lea faalavelave.


Ua fautuaina ai foi e leoleo, ina ia saogalemu le atunuu i feoa'iga ona o le tulai mai pea o nei faalavelave.



464 views

Comments


bottom of page