PC: Savali News paper.
Ua maea sainia se maliega ma le feagaiga i le va o le Matagaluega o Tinā ma nofoaga o loo tausi ai tinā ma tamā matutua i le Mapu i Fagalele ma le Mapu i Pulotu.
O lea feagaiga ma le faamaite a le mālō o loo i lalo o le Paketi a le Matāgaluega, e ala i se seleni e faamatuu mo nei faalapotopotoga.
E $50,000 o le 'ā fa'amatuu mo le Mapuifagalele ae e $20,000 mo le Mapuipulotu i Savaii.
Saunoa le Minisitā o le Matagaluega i Tinā ia Mulipola Anarosa Ale Molioo, o nei fesoasoani tau seleni o le 'ā agai sa'o lea i nofoaga nei, ma na faailoa ai foi e le Minisitā le amanaia tele e le mālō o galuega o feagai ma tamaitai sā e ala i le vaai ma le tausiaina o matua tausi.
I le māe'a ona sainia o nei maliega, sa fautuaina ai e le Minisitā faalapotopotoga nei ina ia lipoti mai i le Matāgaluega le faaaogaina o nei fesoasoani tau seleni ao lei maea le tausaga faaletupe o lenei tausaga.
O le faamoemoega a le Minisita, afai e vave ona tuuina atu lipoti e mautinoa o le 'ā toe iai se isi fesoasoani pea talanoa ina le tala o le tupe i lenei tausaga faaletupe.
O le fesoasoani lenei na fofogaina i le paketi a le mālō 2023-2024.
O le agaga faafetai sa faaalia e tamaitai Sā, ona o lea faamaite tāua a le mālō ae le gata i lea o loo latou molimauina pea le agalelei faaauau a le atunuu mo nei nofoaga.