31 Oketopa 2022
Ua saofaga nei le 'au lakapi liki a le atunu'u le Toa Samoa i le Quarter Final ina ua ia fa'ato'ilalo le au malosi a Farani i lana ta'aloga mulimuli i pulu.
O le vaveao o le Aso Gafua 31 o Oketopa 2022 i Samoa nei na faia ai lea ta'aloga i le va o le Toa Samoa ma Farani i totonu o Enelagi, le atunuu talimalo i le Ipu o le Lalolagi o le Lakapi Liki 2022.
O le ta'aloga mulimuli nei i pulu e sa'ilia ai avanoa o 'au ta'itasi mo le Quarter Final.
O le Toa ma Farani sa la'ua fa' ato'ilalo ina le 'au a Greece ae sa faia'ina uma i le 'au a Enelagi.
I lenei ta'aloga na maitauina ai le tulaga si'itia ai o le ta'a'alo a le Toa Samoa talu mai ana ta'aloga e lua ua mae'a.
O se tasi o tulaga maualuga na maitauina o le vave lea ona fa'asoaina o le polo ma e fa'apena fo'i i le tulaga o le puipuiga ma le osofa'i malosi.
O Samoa lea ua mautinoa le ta'a'alo ai ma le Matema'a Tonga i le Quarter Final o le Ipu o le Lalolagi.
E ta le 'afa muamua o lo'o 28 le Toa Samoa i le 0 a Farani, ae i le uma ai o minute e 80 o le ta'aloga na tula'i mai ai 'ai o le ta'aloga i le Toa Samoa e 62 ae o Farani e 4.
O sikoa na mauaina lea e Tim Lafai (2),Brian To'o (2), Taylan May (4), Harris Tavita ma Anthony Milford na mauaina isi sikoa e 2, ae o a'a ile pou mo 'ai fa'aopoopo na kiki ina lea e Stephen Crichton ma 'ova ai a'a ile pou e 9.
