top of page

Siamupini le a'oga a Robert Louis i le tauvaga lauga Samoa a a'oga o le Sone B.


Ata Pu'eina: Demetrius Ah Mau.


O pa vaeloto o le gagana fa'aSamoa i le a'oga o le Robert Louis Stevenson, na soloia ma sosofa e le tama'ita'i o Sialei i le tauvaga o le gagana Samoa na faia i le laumua o le Sagato Iosefo i le vaiaso ua tuana'i i le Aso Faraile.


O le tama'ita'i o Sialei e vasega 12 i le a'oga a Robert Louis Stevenson, lea na ia lauga i le tauvaga o le Gagana Samoa i le 'autu o le Gagana Samoa ma le Aganu'u e mai i le Atua.


O le 'autu e fa'ato'a piki lava i le aso na faia ai le tauvaga, ona tu'u lea o le avanoa mo le 20 minute e fatufatu ai manatu o le failauga.


E le'i faigofie i le tama'ita'i o Sialei le tauvaga ona o le su'ega lea o le mafaufau, i ni manatu anoa ma lelei e fatufatu ai le lauga.


O le a'oga a Robert Louis Stevenson i Tafa'igata, ua silafia uma e le atunu'u i lana gagana e fa'aaogaina, o le gagana Peretania.


Aepeita'i, ua avea le finau ma taumafaiga a Sialei ma ala e fa'ailoa atili ai le gagana Samoa i totonu o le a'oga aemaise o le to'atele o fanau e malosi i le tu ma aga fa'apalagi.


E le'i tu'uitiitia fo'i le lagolago a le susuga i le faiaoga i le taumafaiga a lea alo o le atunu'u aemaise o si ona tua'a.


O a'oga na 'auai, Seventh Day Adventist, Maluafou, Sagato Iosefo, St Marys, Faleata College, Robert Louis Stevenson, Fa'atuatua Christian Church ma Pesega.







コメント


bottom of page