15 Tesema 2022.
A'o faitau aso ona taunu'u lea i le fa'amanatuina o le fanau mai o le pepe fou o le Kerisimasi o lenei tausaga 2022, ua maitauina fo'i le pisi o Samoa i faiga o fa'atauga ma isi tulaga mana'omia aua tapenaga o Aso Fiafia.
O se tulaga masani lava e tupu i Aso Fa'apenei, o ni isi lea o oloa e mana'omia i taimi 'uma e ono fa'aletonu le sapalai; o le oloa o le aniani ua molimauina le sioki ai i le tele o faleoloa ma supamaketi i Samoa.
O se fa'amatalaga na talanoa mai ai ni isi o tagata fai faleoloa i Samoa, o le fa'aletonu o malaga a va'ala'u oloa ma le tuai ona taunu'u mai i Samoa o le mafua'aga lea o lo'o tula'i mai ai lea fa'aletonu.
O le aniani o se tasi lea o fuala'au fa'amanoni mea'ai e le mafai ona misi i se gasesega a tagata Samoa, peita'i i le sioki ai o le aniani mo se taimi le tumaua ua maitauina le aga'i o le atunu'u e fa'aaogaina isi fuala'au fa'amanogi kuka e pei o le fiu ma aniani saina.
O nai vaiaso fo'i e le'i mamao atu na sioki ai foi le oloa o le pateta i le atunu'u, o lo'o talia le taunu'u mai o ni isi o pusa mo oloa o loo aumai ai ma aniani i se aso o lenei vaiaso.