top of page

Sua le ele'ele mo le falea'oga fou a Vaigaga.


Ata Pu'e: Leatinu'u Wayne So'oialo.

E $5.8 miliona le tau aofa'i o le galuega mo le falea'oga a le nu'u o Vaigaga, lea ua fa'ailo i le sauniga o le suaina o le ele'ele i le aso ananafi-Aso Tofi 23 Novema 2023. O lenei poloketi o lo'o fa'atupeina lea e le Faletupe o le Lalolagi i lalo o le polokalame o le Pacific Resilience Program(PREP). E silia ma le 400 alo ma fanau a le Itumalo o Faleata o loo a'otauina i lea a'oga, ma ua silia ma le 60 tausaga o iai le falea'oga tuai lea ua tu'u i lalo. O le taimi nei o lo'o fa'aaogaina e alo ma fanau a'oga ni isi o fale o aiga o le nu'u o Vaigaga mo a'oa'oga se'i toe mae'a lea fausiaina o le falea'oga fou. O le afioga i le Palemia, Fiame Naomi Mata'afa na saunoa i lea sauniga fa'apitoa ma sa ta'ua ai le tala'aga o lenei falea'oga. "O loo faamauina i le talafaasolopito o le faleaoga ua tuuina i lalo, na amata i le falema’a le aoga. Sa fai ai le aoga a nai faafeagaiga mo fanau a le Nu’u i le 1960, ona faasolo mai ai lea i le fausia o le faleaoga laupapa i le 1964, ona fausia lea o le faleaoga mautu i le 1984 ma faaauau mai ai seia o’o mai i le asō. O lona uiga ua 63 tausaga talu ona faavae lenei aoga e tua’ā o le afioaga. Ou te talitonu, i lenei taimi umi, sa tele le sao o lenei faleaoga i tamafanau a le afioaga ma le Itumalo i le a’oa’oina o le poto salalau, ma e lē taumate o le toatele o loo soifua mai nei, ua faamanuia i ai le Atua i taleni ma tomai eseese na amata mai i lenei faleaoga. " Na fa'ailoa fo'i e le ta'ita'i o le malo, o lenei falea'oga o se poloketi muamua lenei o falea'oga ua fausia i le fesoasoani a le Faletupe o le Lalolagi po'o le World Bank. "O le Faleaoga lenei, o se tasi o atinae muamua lea i totonu o Samoa, ua fausiaina i lalo o fesoasoani a le Faletupe o le Lalolagi poo le World Bank. O se galuega na afua mai i le mae’a ai o asiasiga o faleaoga o loo i le atunu’u sa fa’atino ina ua tuana’i fa’alavelave fa’alenatura tetele ma saga faamautu ai le alagatatau ona si’itia tulaga ma māta’itu lelei nofoaga talafeagai mo le fausiaina o faleaoga auā le saogalemu o fanau aoga". I le saunoaga a le Palemia, sa ia ta'ua ai le tele o faleaoga na fa’amauina le toe fia fa’aleleia ina ua mae’a lenei asiasiga a le Mālō ma ua fa’agasolo ma mae’a fausia nisi o faleaoga, i lalo o le Polokalame fesoasoani mo faleaoga mai i pa’aga mai fafo fa’apea vaegatupe o loo faatatauina i le Matagaluega o Aoga. "O le fesoasoani a le Faletupe o le Lalolagi ua tā’ua o le Polokalame mo le Si’itia o Tulaga mo le Tali Atu i Fesuiaiga o le Tau i le Pasefika, lea ua mafai ai ona tu’uina i lalo le faleaoga tuai, tusia le ata, ma fa’atupe le fausiaina o lenei atinae tele. O le ogaoga o suiga o le tau o se faafitauli ua pito sili ona lamatia ai le soifuaga manuia lautele o atunuu o le lalolagi, aemaise lava i atumotu laiti e pei o Samoa. O atinae faapenei, e faataua ai le mafai ona tali atu i suiga ogaoga o le tau, aemaise le saogalemu o nai a tatou fanau aoga. O le nofoaga foi o loo fausia ai lenei faleaoga, o se nofoaga lelei ma tutotonu, e mafai ona autova’a mai iai le afioaga pe a mo’omia i taimi o faalavelave matuiā". Fiame Naomi Mata'afa. O le naunauta’iga a le Mālō ina ia si’itia le a’oa’oina o fanau ma tupulaga, ina “ia fa’aagava’aina ai alalafaga, fa’amausalī lotoifale, ma fa’ama’ite le fa’atupula’ia o le tamāo’aiga”, e pei ole sini autu o leTaiala mo le Lumana’i Manuia o Samoa 2022-2026. O le poloketi lenei o le 'a nafa ma le Konekarate a le Zheng Construction.

تعليقات


bottom of page