top of page

Talia e Iapani le talosaga a Lalomalava mo le latou falea'oga fou.



O le taeao nei na sainia ai le feagaiga i le va o le afio'aga o Lalolamalava ma le Ofisa o le Amepasa o Iapani, i le toe fausiaina o le falea'oga o le Aoga Tulagalua i totonu o le nu'u.


O le polokalame mo a'oa'oga a le malo o Iapani le Japans Grant Assistance for Grass Roots Human Security Projects, lea o lo'o auala mai ai lea fesoasoani mo le afio'aga.


O le afioga i le ali'i Amepasa o Iapani ia H.E Senta Keisuke, sa sainia lenei feagaiga ma sui o le Komiti o le A'oga tulagalua a le nu'u.


E tusa ma le $215,301 tsls Amerika lea fesoasoani a Iapani mo Lalolamalava, ina ia toe fausia ai se falea'oga fou e sui tulaga i le falea'oga o lo'o iai nei ua silia ma le 40 tausaga le matua. O le falea'oga e 8 potu, potu tusi, ofisa o le pulea'oga, potu mo faia'oga, ofisa ma fale le ta'ua.


Na talosaga le Komiti o A'oga mo se fesoasoani a le malo o Iapani, ina ua maitauina e le'o toe saogalemu le falea'oga o lo'o iai nei, ona ua pala ma tele ina fa'aletonu vaega eseese ona o mala fa'alenatura.


O lenei Poloketi o le 'a mafai ona maua ai e fanau o lalolamalava se si'osi'omaga lelei aua a'oa'oga e fa'apena fo'i i ali'i ma tama'ita'i faia'oga.


Na momoli le fa'afetai a sui o le Komiti i le malo o Iapani ona o le taliaina o le talosaga, o le tausaga nei 2023 na tu'uina mai ai lenei talosaga ma o lea ua tali mai ae le'i mae'a lenei tausaga.


Ua fa'amaonia fo'i o se taimi o le tausaga fou o le 'a fuafuaina e amata ai lea galuega pe 'a mae'a ni isi o sainiga feagaiga ma Konekarate o le 'a fausiaina.


O le Konekarate faufale o le Evaeva Enterprises o le 'a nafa ma le fausiaina o le falea'oga ae o le SUCON o le 'a va'aia le galuega aemaise o galuega fa'ainisinia.



Comments


bottom of page