Joshua ma ona mātua/S.S.A.B
O le susuga ia Joshua Filisi Leung Wai, o le ulumatua a le afioga ia Aumua Ming Leung Wai ma Tofilau Fiti Leung Wai, lea ua taliaina aloaia e le Faamasinoga Maualuga a Samoa i le sauniga na faataunuuina e lana afioga i le Faamasino Sili ia Satiu Simativa Perese i le asō.
Na faafetai e le susuga ia Joshua le Atua ina ua tau lau o lona faamoemoe.
O Joshua, o se alo e faasino i afioaga o Moamoa, Sapunaoa, Poutasi, Iva ma Moataa. O le agaga faagaeetia na faailo e lenei alii talavou ona o le nofo tatalo a ona aiga, mātua ma tagata uma sa lagolagoina lona taumafai.
Sa faamanatu e le afioga i le Faamasino Sili i le susuga i le alii Lōia le tāua o ona tofi ma lana taleni ua maua mai le Atua e tautua ai Samoa ma ona tagata.
O le susuga i le alii lōia, sa aotauina i le Iunivesitē o Waikato, ma i le luasefulu tausaga ua tuana'i o le Iunivesitē lava lea sa faauuina mai ai ni faailoga lōia a ona mātua.
O le tamā o Joshua o se tamālii iloga i le tulāfono ma sa avea foi ma Lōia Sili a le mālō , o lona tinā o se lōia faauuina foi ma o ia o le pulesili o le S.S.A.B.
