O le vaiaso na te'a i le Aso Tofi na tula'i mai ai se matā'upu i le nuu o Lefagaoalii i Savaii, ina ua faatino se faaoogasala a le afio'aga i le tasi o matai ona ua le usita'ia se poloaiga na tuu iai e le nuu ina ia tula'i ese ma fanua.
"E gofo i fafo le toeaina ua aafia ae fai ma sau i Samoa i Lefagaoalii Savaii, e asi mai ona auaiga ae ai e sau ua fai le pa puaa a le faifeau Pope i lona fanua, ai o le ita tele o le toeaina na ia lafo ai ni faamatalaga i le faifeau e aofia ai ma matai o le afioaga"
Na tā'ua e le pa'aga, o le mafuaaga lea na fono ai loa le nuu ma tasi ai ina ia fa'ate'a le nei tamā ma le nuu ma le tuutuuga ia ta le itulā e 4pm i le afiafi ua tu'ua le fanua ma le nuu.
E fa'apea le saunoaga a le tatou pā'aga, na faataunuu le finagalo o le nuu i le faasalaga ina ua le usitaia e le tamā nei le poloaiga a le nuu sa tūto'oto'o ai.
I se ata na maua mai ia tatou su'esu'ega, le faaaoga ai e taulele'a o le lā'ai e amo ai le tamā ma le faamoemoe e ave i le aai e faataunuu ai le faasalaga.
Ae o tā'ua, e fai sina tigaina o lenei tamā ona e amo lava ma faapalasi i luga o le auala ma toe amo se'i oo lava i le nofoaga na faamoemoe e faataunuu ai le faasalaga lenei.
O loo taofia nei le tamā i le falema'i i Tuasivi ona o le ogaoga o ona manu'aga.
Na agai atu leoleo i le nu'u ma ave matai ma taulele'a na faataunuuina lenei gaioiga ma o lea na toe tatala atu i tua i le asō.
*Mu le foaga: O le fa'asalaga nei e faatinoina i aso anamua pe 'āfai e faatulai ese se isi ma le nu'u ae oo atu i le taimi sa poloa'ia e tulai ai ma o ese ona faatinoa lea o lenei faasalaga. O le faasalaga lenei susunu uma fanua, fale ma meatotino ma e oo foi i le tagata nofosala.*