Ua toe o ni aso ona fa'ataunu'u lea o le fa'amoemoe mo le sa'iliga o le tausala o le Pasefika I Saute 2024-2025.
Mo le taimi muamua, o le 'a talimalo ai Nauru i lea tauvaga talu mai le tausaga e 1987 na fa'avae ai ma o se tauvaga fo'i ua taula'i ai tama'ita'i mai atunu'u ese'ese o le Pasefika.
Ua tapena foi le tama'ita'i o loo pale i le Miss Samoa ia Moemoana Safa'ato'a Schwenke mo le lu'iina o le pale o lenei tauvaga i le tausaga lenei 2024.
O le aso 28 o Ianuari e tatala ai le tauvaga ma e taualauga i le aso 4 o le masina o Fepuari 2024.
O le pale o le Miss Pacific Island o lo'o umia nei e le tama'ita'i Papua Niu Kini o Josie Nicholas.
Talu mai le tausaga e 1987, ua fa'afitu ona pale Samoa i le tauvaga lenei e pei ona mua'i fa'apaleina ai le tama'itai ia Verona Parker i le tausaga e 1996.