Manuia le 'aufai fa'ato'aga Samoa ina ua maua le isi faitoto'a mo Niu Sila i le Tasi Market.
Ua 'amata ona le toe pa'u vale ma pa'u fua se afu o le 'aufaifa'ato'aga, faifaiva ma le 'au failafumanu a Samoa ina ua 'amata ona matalatala mai faitoto'a mo maketi i atunu'u i fafo aua le fa'atauina atu o fua o fa'atoaga, i'a lalo ma 'a'ano o manufasi mai i Samoa.
Ua le gata ina matalatala faitoto'a o isi Pisinisi a tagata palalagi ae ua fa'apena ni isi o tamali'i Samoa e iai a latou pisinisi i atunu'u i fafo.
O le susuga i le fa'afeagaiga ia Tole'afoa Larry o le tasi nei o tamali'i faipisinisi Samoa i Niu Sila ua molimauina lona agaga mai i tagata o le atunu'u e ala lea i le fa'atauina atu o oloa mai tatou lava tagata aemaise o fua o fa'aeleeleaga mai fa'atoaga, i'a lalo fa'a 'aisa mai le 'aufai faiva, 'a'ano manufasi mai le 'au fai lafu manu aemaise o isi oloa gaosi mai i pisinisi a tagata Samoa.
O Tole'afoa e umiaina le Maketi o le TASI i Niu Sila, o fale'aiga o lo'o fa'atauina ai mea'ai e gaosi mai i fua o fa'atoaga mai i Samoa aemaise o ni isi o Pamu kesi ua maua ai fo'i avanoa o tagata Samoa e galulue ai.
I le vaiaso ua tuana'i, na maua ai le avanoa e malaga mai ai le susuga i le fa'afeagaiga i Samoa ma talanoa ai ma ni isi o le 'aufaifa'ato'aga aemaise o le afioga i le Minsita o Fa'ato'aga ma Faigafaiva ina ia fa'amautina ai pea le faiga pa'aga a le Tasi Market ma le 'aufai atina'e i Samoa e maua ai maketi i Niu Sila.
Sa maua fo'i ma le avanoa e fa'asoa ai ma ni isi o sui o le Asosi o le 'au faifa'ato'aga i Samoa e pei o le fetalaiga ia Va'aaoao Alofipo ina ia fa'amautu se faigapa'aga a le Pisinisi i Niu Sila ma le au faifa'atoaga a Samoa.
O le Aso Toonai 4 o Mati 2023 na asia ai e Toleafoa le Ulua'i Seleselega a A'ana Alofi 1 i le nu'u o Faleasi'u, o lona fa'amoemoe ina ia fausia se so'otaga vavalalata ma le 'au faifa'ato'aga i nu'u ma afio'aga ia mautinoa ai pea le fa'atumauina ona maua e tagata o nu'u o lo'o galulue i fa'ato'aga o avanoa e fa'atauina atu ai fua o fa'atoaga i fafo pe 'a o'o i le taimi e fafai ai.
E ese'ese uma vaega ua 'a'apa mai ai le 'a'ao fesoasoani a le Fa'afeagaiga, o le vaiaso fo'i na te'a na ia tu'uina atu ai pepa faigaluega e 50 mo tagata Samoa na manuia pepa i le se'i o le Quota a Niu Sila i le tausaga 2022.
O le fa'amoemoe o nei Pepa Faigaluega ina ia mautinoa le fa'amautuina o avanoa faigaluega e mafai ai e tagata Samoa ona galulue i ni galuega i totonu o Niu Sila.