top of page

Tatala le avanoa e maimoa ai tagata i toleniga a le Moana Pasefika (North Harbour Stadium, NZ).

23 Ianuari 2024,



Ua savali nei le tolu vaiaso talu ona toe tu’u fa’atasi ali’i ta’aalo o le Moana Pasefika ma fa’agasalo ai loa a latou toleniga e pei ona masani ai.


Sa le’i mafai ona maua se avanoa e maimoa ai tagata lautele a’o fegai le ali’i ta’aalo ma  toleniga i le tolu vaiaso talu ai. A'o lea ua fa’asalalau i luga o le itulau a le Moana Pasefika ( Moana Pasefika Facebook Page) se fa’asalalauga i le tatala ai o le avanoa i aiga, o uo ma paaga lagolagosua ma so’o se tagata e fia maimoa ma matamata i toleniga ma tapenapenaga a li’i ta’aalo i le aso 29 o le masina lenei o Ianuari.


O le malae ta’alo o North Harbour Stadium lea o le ‘a fa’atino ai toleniga mai le itula e 10 i le taeao seia paia le 1 le aoauli. O se avanoa lelei fo’i lea e feiloa’i ai tagata ma nisi o sui tuai fa’apea sui fou o le ‘au ua filifilia i lenei tausaga i lalo o le lisi o au tolelegi (training squad).


O lo’o fa’atumauina le alo o le atunu’u ia Miracle Failagi lea sa ta’alo ai i le tausaga ua te’a e pei ona toe sainia ai lana konakarate i le Moana Pasefika mo le tausaga lenei, lea sa ta’alo fo’i i le  Manu Samoa i le ipu o le lalolagi 2023 o se tasi foi o sui tuai o le ta’ito’a fitu( Manu Samoa 7’s).


O le se’ei mai ai o le tamali’i Samoa ia Fa’alogo Tana Umaga i le tofiga o le faiaoga ulu mo le Moana Pasefika ua mafai ai ona filifilia (wide squad)  nisi o alo o le atunu’u o lo’o ta’alo i totonu lava o Samoa (local players) e pei ona iai Melani Matavao ma Tuna Tuitama, o i laua fo’i na avea ma sui filifilia o le Manu Samoa 7’s ma ta’aalo ai i le tele o vae o le ta’amilosaga ta’ito’a fitu o le laolagi.


O se fiafiaga tele fo’i le filifilia ai o se ali’i Samoa e avea ma kapeteni o le Moana Pasefika mo le tausaga lenei le susuga ia Jasmes Lay lea sa ta’aalo i le Manu Samoa i le ipuo le lalolagi ua tuana’i atu, o James Lay sa ta’alo i le tulaga o le pou po’o le numera 1 e sau mai le afioaga o Sasina ma Safotu i Savai’i. 


O le aso 24 o Fepuari i le tausaga nei lea ua fa’atulaga mai ai le ta’aloga muamua a le Moana Pasefika lea o le ‘a ta’aalo ai ma le ‘au a Highlanders. O le taimi nei e le’i mautu se filifiliga a le faiaoga ulu mo e o le ‘a filifilia e ta’alo i le ta’aloga muamua i le amataina ai o le ta’amilosaga o le DHL Super Rugby Pacific.


411 views

Comments


bottom of page