Tūsia e Lauano Demetrius Ah Mau.
O le taeao nei na faatautaia ai se sauniga fa’apitoa i le tatala aloaia ai o le ofisa o le Lowie Recruitment mai i Niu Sila mo Samoa nei.
O le susuga ile fa’afeagaiga ia Rev. Sakaio Maiava na taitaia le sauniga i se tatalo ona tuu loa lea o le avanoa i le susuga i le Pule Sili o le Lowie Recruitment mai Niu Sila ia Steve Sargent e ooti ina le lipine.
O le Lowie Recruitment o se kamupani mai i Niu Sila, ma o latou olo’o galulue i le auina atu o tagata eseese mai le tele o atunu’u e iai Filipino, Ausetalia ma nisi o atunu’u, ma e tapenaina e latou pepa faigaluega mo le fa’afaigaluegaina o tagata e saili ai manuia i totonu o Niu Sila.
O Samoa le atunu’u muamua o le Pasefika ua faatu ai se lala o le Lowie Recruitment, ma o lea fa’amaite sa galulue ai le pulega o le kamupani i nisi o tausaga peitae ane o le fa’ama’i o le Koviti 19 na avea ma mafuaaga ua fa’atuai ai ona fa’agaioi lea fuafuaga.
O se ali’i Samoa olo’o i totonu o le pulega ma o ia fo’i o se tasi o pule sili le susuga ia Ben Ah Mau sa finau malosi i le taumafaiga o lenei lala i Samoa nei, ona o le vaai alofa i tagata Samoa o lo’o maua avanoa e malaga atu ai Niu Sila i le Quota ona feagai lea ma le fa’afitauli o le tau sailia o ni galuega, a’o lea ua aapa mai lenei kamupani ia fa’afaigofie le maua o pepa faigaluega pea faamanuiaina i le Quota e aunoa ma se toe tau saili o ni galuega pea faumautu atu i Niu Sila.
Sa taua e le pule sili o le Lowie Recruitment e tai foliga tutusa le latou auaunaga ma galuega faavaitaimi, pau le eseesega o avanoa e mafai ona ofoina e latou e fua i luga o tagata ua faamanuiaina i le Quota a Niu Sila, e iai foi aiaiga e tatau ona uia ma alafua e mulimulita’i ai ona fa’atoa mafai lea ona filifili i tagata ua agavaa ma alagatatau ona tuuina iai pepa faigaluega moNiu Sila.
O le taimi nei e to’atasi le ali’i Samoa lea ua faamanuiaina i le auaunaga a lenei kamupani e ala i le maua ai o le pepa faigaluega e faigaluega ai i Niu Sila, ma o le masina fou lea ua fuafua e malaga atu ai i Niu Sila ma faigaluega ai.
Na momoli le agaga fa’afetai o le susuga i le fa’afeagaiga ia Rev. Sakaio Maiava i le pulega o le Lowie Recruitment ia Steve Sargent ma le susuga ia Ben Ah Mau, na malaga mai i Niu Sila mo lenei fa’amoemoe o le tatala aloaia ai o se lala o le kamupani ma fesoasoani i tagata Samoa, o loo fia maua ni pepa faigaluega mo Niu Sila talu ai o nei aso ua le o toe faigofie le fa’agaioiga o nei mea, ae e iai le talitonuga o le susuga i le faafeagaiga o le a fa’afaigofie ona o le auaunaga a le Lowie Recruitment.