top of page

Toe fa'a'e sikulati sa tu'ua'ia i le ave'esea o i'a mai i le koneteina i Matautu.



I le mae'a o se su'esu'ega fa'aloto'ifale na fa'atinoina e le Pulega o Uafu a Samoa i ni isi o tagata faigaluega i le Uafu i Matautu, ua taunu'u ai i le leai o ni fa'amaoniga o latou nei sa to'esea ni i'a mai i se koneteina.


O le amataga o le tausaga lenei, na fa'amaloloina ai le tumau i latou e to'a 16 sa faigaluega i galuega fa'asikulati, ina ua masalomia lo latou toesea o i'a mai i le Koneteina a se tasi o kamupani.


Ua fa'ailoa fo'i e le Matagaluega o Leoleo, i se pepa o fa'amatalaga na tu'uina atu i le Savali; e le'i iai ni moliaga sa molia ai i latou ua tu'ua'ia ona o le le lava o ni molimau e fa'amaonia ai.


Na fa'ailoa e leoleo, ina uia taunu'u atu le ofisa e fa'atino le su'esu'ega aepeita'i ua auina atu lenei Koneteina o i'a i atunu'u e mamao, ma e na'o ni ata pu'e sa mauaina o le vaega ua fa'aleagaina o lenei koneteina ae ua le'o toe maua atu i le uafu.


Sa asia fo'i faila o ata i luga o mea pu'eata a le uafu(CCTV Camera), peita'i e le'i ola nei mea pu'eata i le taimi lea o lo'o ta'ua na tula'i ai nei gaioiga.


O ta'iala masani a le Ofisa o Leoleo, e le mafai ona fa'aauau ni su'esu'ega i se mata'upu pe 'afai e le'o lava ni molimau.



753 views

Comments


bottom of page