Ua toe filifilia nei le Afioga ia Lematua Gisa Fuata'i e avea ma pule o le Ofisa o le Pule Faatonu a Samoa mo le isi tolu tauasaga.
Ina ua mae'a iloiloga a le Komiti Faapitoa na feagai ma faatalanoaga ma le iloiloina o lea avanoa, ma tuuina atu ai le fautuaga i le laulauāfono a le Kapeneta, ma faamaonia ai i lana fonotaga i lenei vaiaso, le toe fa'aauau o lea tamālii o le atunuu i le tōfiga o le Pule Faatonu mo le Ofisa o le Pulega Faatonu a Samoa.
O Lematua, o loo ia umia ina ni faailoga maualuluga e pei o le Masters in Commerce and Administration mai le Iunivesite o Vitoria i Niu Sila i le tausaga e 2003, e aofia ai ma le Post Graduate Diploma in Information Systems Management.
Na faauu mai Lematua i le Kolisi o Samoa i le 1973, sa auauna foi i le Komiti Faafailautusi a le National I.C.T. Sector mo le ono tausaga, ae le gata i lea o le Matagaluega o Fesootaiga ma Faamatalaga Televavave Faaneionapo(M.C.I.T) i le tofiga o le Ofisa Sili Lagolago o Pulega.
"E 11 tausaga sa auauna ai i Fa’alapotopotoga Fa’avāomālō e aofia ai;
• Fa’auluuluga o Vaega tau Polōketi mo le International Telecommunication Organization, I.T.U. i Geneva, Switzerland i le 2009 i le 2016.
• Avea ma Faufautua Fa’aitulagi i le Pasefika, i le Fa’alapotopotoga o Feso’otā’iga Fa’aneionapo a Mālō o le Taupulega, i totonu o Peretania Tele mai le 2016 i le 2018.
• O le 2018 se’ia o’o mai i le taimi nei, o lo’o avea o ia ma Fa’atonu o le Atina’e Tau Feso’otā’iga, i le Fa’alapotopotoga o Feso’otā’iga Fa’aneionapo a Mālō o le Taupulega i Peretania Tele.
• Sui Failautusi Aoao o le Fa’alapotopotoga o Feso’otā’iga Fa’aneionapo a Mālō o le Taupulega i Peretania Tele, mai lava i le 2018 se’ia o’o mai i le asō".
O le afioga ia Lematua, o lana nofoā’iga lona lua lenei ta’itolu tausaga.