Photo credits to Ministry of Agriculture and Fisheries.
O le Aso To'ona'i 11 o Novema na aga'i tasi ai au fai fa'ato'aga ma nu'u uma o le Itumalo Palota o Vaimauga 3, i le nu'u o Vailima i le vaega o lo'o iai le Ofisa o le Fono Fa'avae; e fa'ataunu'u le fa'amoemoe o le ulua'i seleselega po'o le fa'aaliga o fua o fa'ato'aga ma atina'e ese'ese.
Na molimauina le to'atele o tagata na vave ona taunu'u atu i lea nofoaga, aemaise o turisi ma tagata o isi afio'aga e fai a latou fa'atau i le taeao ae le'i amatalia le sauniga e tatala ai le ulua'i seleselega.
O le tele o isi au fai fa'ato'aga, na taulia a latou fua o fa'ato'aga e le'i taitai ona amata le fa'amoemoe.
O le afioga i le Minisita Lagolago o le Matagaluega o Fa'ato'aga ia Maiava Fuimaoni Tito Asafo, sa fai ma sui o le malo e momoli upu fa'ala'ei'au i tagata galulue o le Itumalo o Vaimauga 3.
O le uluai seleselega o se tasi o fa'amaite a le faigamalo nei, ina ia maua avanoa mo tagata fai fa'ato'aga e fa'ailoa ai a latou fa'a'ele'eleaga ma seleselega, ae o le isi itu ia maua ai ni maketi mo le tu'uina atu i fafo aua tupe maua.
E le gata i lea, ae ia mautinoa le maua pea e Samoa o taumafa e aunoa ma le toe fa'alagolago i atunu'u e mamao.
I le fa'aaliga a Vaimauga 3, sa molimauina ai le lima ola o tagata fai fa'atoaga, fetiitii fua o fa'atoaga, lelei lafumanu aemaise o isi atinae meataulima.
O le taimi nei o lo'o ua toe fa'aauau le poloketi lenei o fa'aaliga fa'atoaga mo le tausaga fa'aletupe fou 2023/2024.
