top of page

Ulua'i taimi mo le 'au si'isi'i a fanau aoga mo ta'amilosaga si'isi'i uamea mamafa fa'avaomalo.



Photo Supplied: NBS


O le afiafi o le aso Tofi 16 o le masina lenei o Me 2024 sa tu'ua ai e le 'au si'isi'i a fanau aoga ele'ele o Samoa nei ma faimalaga atu mo Niu Sila i le nofoaga o le 'a fa'atautaia ai le ta'amilosa si'isi'i uamea mamafa mo fanau aoga o le NZ Invitational School Weightlifting Championship 2024.


O se taimi muamua lenei ua mafai ona auai ma masi'i ai se 'au si'isi'i a fanau aoga e auai atu i nei ta'amilosaga fa'avaomalo o va'aiga fo'i ia i le alualu i luma o le atina'eina o lenei ta'aloga i totonu o Samoa, ma o le a amata fa'agasolo i le aso To'ona'i ma le Aso Sa o le fa'aiuga o lenei vaiaso i totonu o Papatoetoe i Aukilani i Niu Sila lenei ta'amilosaga.


O se tasi nei o ta'amilosaga fa'avaomalo(NZ Invitational School Weightlifting Championships 2024) e auai ai 'au fili tu'ufa'atasi a tamaiti aoga mai atunu'u eseese o le Pasefika fa'apea ai Niu Sila ma Ausetalia.


O le 'au a le atunu'u o lo'o masi'i mo lenei fa'amoemoe sa mafai ona tu'u fa'atasia ma filifilia mai i alo ma fanau e sefulutasi mai i kolisi maualuluga i totonu o le atunu'u lea o le 'a fai ma ave fu'a a Samoa i nei ta'amilosaga fa'avaomalo mo le ulua'i taimi.


O lo'o ave le lagolago malosi e le faletupe a le National Bank of Samoa le fa'amoemoe o lo'o auai atu ai le 'au fili a alo ma fanau aoga a si o tatou atunu'u i Niu Sila.

Comentarios


bottom of page