Tūsia e Lauano Demetrius Ah Mau/ Ata Pu'eina: Touch Rugby Samoa.
O le masina o Iulai i le tausaga lenei 2024, o le 'a faia ai se taamilosaga tele mo le ipu o le lalolagi i le ta'aloga o le lakapī pa’i(Touch Rugby) i totonu o le aai o Nottingham i Enelagi.
O lea ua tapenapena atu iai le asosi lakapi pa’i a Samoa, ua faailoa foi le lisi tolegi(trainging squad) mo i latou uma ua filifilia o le a faagasolo ai toleniga ma tapenapenaga aua se filifilia ai o ‘au e tauaveina le igoa o Samoa i lea taamilosaga tele.
O i latou ua filifilia mo le training squad sa filifilia mai i taamilosaga mo kalapu pa’i uma a Samoa, sa mafai ona faatinoina i le tolu vaiaso talu ai, ma e 4 vaega ua vaevaeina ai e aofia ai le Open Mens team, Open womens, open mix team ma le over30’s team.
O Samoa o lo’o numera tasi i lenei taaloga i totonu o le Pasefika atoa, pe 'ā fua iai i ta'aloga o le Pasefika sa faia i Solomona i le tausaga ua tuanai o le au a Samoa sa siamupini ai i vaega uma o le taamilosaga pa’i e iai le au a tama ma le au a teine faapea ai ma le ‘au tu’afa’atasi a tama
ma teine.
Ua agalelei foi le faletupe o le PacificEzy e fesoasoani i le lagoalgoina o lea faamoemoe.
O le aso 15 i le aso 21 o le masina o Iulai o le a faagasolo ai lenei taamilosaga mo le ipu o le lalolagi i le taaloga o le lakapi pa’i(Touch World Cup).