Photo Supplied: Samoa Cricket
O lo’o faimalaga atu le ‘au kirikiti a tama’ita’i e i lalo o le 19 tausaga le matutua a Samoa mo le ta’amilosaga fa’avaomalo o le kirikiti ua taua o le ICC EAP u19 Womens Qualifier o le ‘a faia i le atunu’u o Indonesia i le masina lenei o Me 2024.
O lenei ta’amilosaga e mo le sailia ai o ni ‘au se tolu pito i luga i le fa’atulagaina o ‘au pea maea ta’aloga ona mafai lea e ‘au nei e tolu pito i luga(top3) ona agava’a ma saofaga atu mo le ta’amilosaga tele a tama’ita’i e i lalo o le 19 tausaga le matutua mo le tausaga fou lea o lea a talimalo ai le atunu’u o Malaysia ma Thailand mo le ulua’i taimi.
E fa atunu’u o le a fa’agasolo ai lenei ta’amilosaga i le sailia ai o ‘au e tolu pito i luga mo le ta’amilosaga tele i le tausaga fou, o ‘au nei e aofia ai Papua New Guinea, Indonesia, Fiti ma Samoa.
E tasi le vaiaso o le a fa’agasolo ai ta’aloga e amata atu i le aso 14 aga’i i le aso 20 o le masina o Me i le tausaga lenei 2024, o le ta’aloga muamua mo le ‘au a Samoa lea ua fa’atulaga mai i le aso 14 o le a feiloa’i ai ma le ‘au a Indonesia.