top of page

Asiasiaga a le Failautusi Aoao o le C.H.O.G.M i Samoa.


By Lauano Demetrius Ah Mau.


O lo’o i Samoa nei le failautusi aoao o le Fonotaga Faavaomalo a Ta’ita’i o Malo o le Taupulega ia Rt. Hon. Patricia Scotland KC fa’atasi ai ma lana aumalaga.


O le malaga mai ai o le failautusi i Samoa nei e mo le talanoaina ma vaavaai i le gasologa ua iai tapenaga a Samoa aua taligamalo mo le fonotagata ia Oketopa i le tausaga nei.

Na asia e lenei aumalaga nofoaga i totonu o Samoa nei lea ua fuafua e faia ai fonotaga ia Oketopa e pei ona iai le Maota o le Palemene, Maota o Tupulaga Talavou a le E.F.K.S i Sogi, o le fale ta’alo i tuanaimato ma nisi o faletalimalo ma nofoaga ua maea ona atofi mo le fonotaga a le C.H.O.G.M ia Oketopa i lenei tausaga.


Na maua le avanoa o lenei aumalaga e faia ai se fonotaga ma le Komiti Galulue a Samoa mo lea faamoemoe tele, i lea fonotaga na talanoaina ma soalaupule ai mataupu uma e patino i le fonotaga ma le taligamalo a Samoa lea e faasauni atu ai.


O mataupu i le saogalemu o tagata uma o le a malaga mai i le fonotaga ma le tausiga lautele e pei ona iai apitaga, auala o femalagaiga, lipoti tusitusia, o fesootaiga televavave faaneionapo ma le tele o mataupu sa laualuga ai lenei fonotaga.


Sa maua fo’i le avanoa e asiasi ai i le afioga i le tama’ita’i palemia le Afioga i le Sa’ofa’apito ia Fiame Naomi Mataafa aua lava le faamautuina ma le mautinoa ua lava tapena Samoa mo lana taligamalo. Na feiloai atu foi le failautusi ma lana aumalaga i le afioga i le Ta’ita’i o le Itu Agai ia

Tuilaepa Dr. Sailele Malielegaoi.


O le fiafiaga tele o Rt. Hon. Patricia Scotland KC ma le aumalaga o le taunu’u mai ma asia le tele o nofoaga i totonu o Samoa o le a faia ai le Fonotaga o le C.H.O.G.M na molimau ai o lo’o ta’atia i se ta’atiaga lelei ma sologa manuia tapenaga a Samoa aua lana taligamlo ia Oketope o

le tausaga nei.


O le faaiuga o le vaiaso nei o le a toe taliu ai lenei aumalaga ma o lo’o iai le fa’amoemoega o le ogatotonu o le tausaga lenei o le a toe malaga mai ai a’o le’i tata apefoe i le amata usuia ai o lenei Fonotaga Tele.

Comments


bottom of page