7 Iuni 2022
O le Aso Sa 5 Iuni 2022 na malaga atu ai le Tama'itai Palemia o Samoa le afioga ia Fiame Naomi Mataafa i Niu Sila i nisi o fonotaga faalemalo. Ae lei agai atu le tamaitai palemia i ana fonotaga e pei ona fuafuaina, na maua le avanoa e auai atu ai ile faamanatuina o le tutoatasi o Samoa e pei ona faamanatuina ile malo o Niu Sila ile taeao o le Aso Gafua 6 Iuni 2022.
Na molimauina le faatumulia o le fale Samoa i Magele ile sauniga faapitoa, sa amata i Savali e pei ona masani ai, ona sosoo lea male sauniga lotu. I le maea o le sauniga lotu ona sisiina lea o le tagavai o Samoa e pei ona sisiina e le alii Minisita o tagata Pasefika ia Aupito William Sio.
O se fiafiaga na i tagata nuu o Samoa i Aotearoa ona ole maua ole avanoa fa'aauro e auai ai le tamaitai Palemia i lenei fa'amoemoe taua.
O le faigamalaga a le tamaitai Palemia o lo'o auai faatasi atu male afioga ile alii Minisita o Pisinisi Alamanuia ma Leipa ia Leatinuu Wayne Sooialio, fa'auluuluga ole matagaluega o le Va i fafo ia Peseta Noumea Simi aemaise o le Ofisa Sili o le ofisa o le Palemia male Kapeneta le fetalaiga ia Agafili Tomaimano Shem Leo.
Ua iai le faamoemoe o lea mafai foi ona auai atu le tamaitai palemia i le tatalaina aloaia ole ofisa o le konesula o Samoa i le malo o Fiti i lenei vaiaso.
