Tūsia e Lauano Demetrius Ah Mau/ Ata Pu'eina: O.E.C.
Ua fa’asalalauina fa’alauaitele e le ofisa o faiga palota a Samoa, fuafuaga ua maea ona fa’ataoto e ala i le toe resitalaina o tagatanuu Samoa uma ua agava’a e resitala mo le faiga palota o lo’o loma nei i le tausaga 2026.
O le 'a faasolo i tua o Itūmālō ma afioaga ta’itasi lenei polokalame a le ofisa, o le naunautaiga lava ia ina ia mautinoa le resitalaina o tagatanuu uma ma ia mautu ma sa'o atoatoa le fa’ata’atiaga o le lisi o tagata palota mo nuu ma itumalo uma o le atunuu a’o fa'asauni atu ai i le faiga palota tele.
Ua talosagaina foi e le ofisa le mamalu o le atunu’u ina ia lagolagosua le galuega, e ala i le fa’amautuina mai o pepa ua manomia e tatau ona faagasolo ai le resitalaina o tagata ta’ito’atasi, e aofia ai pepa fanau, laisene avetaavale poo se ID faigaluega, e tatau ona iai se pepa faamaonia o le matai peafai ua matai, ua faailoa foi afai o loo e alala i se fanua umia saoloto e manomia foi se pepa faamaonia o lou fanua lena.
O se taimi o i luma o le 'ā toe logoina ai e le ofisa o faiga palota le faagasologa ma le faataatiaga o fuafuaga uma aua le nofo silafia e le atunuu.
O le masina o Aperila o le a amatalia ai lenei galuega ma o le a oo atu lava le ofisa i itumalo palota, nuu ma afioaga ua fa’amautuina.