1 Fepuari 2023.
Na fa’amaonia mai e se tatou pa’aga fa’atuatuaina o lea ua tapena le Afioga ia Lautimuia Afoa Uelese Va’ai e tauva i le faigapalota laitiiti mo le Itumalo o Vaimauga 3 lea ua fa’atulaga mai i le Aso 24 o le masina lenei o Fepuari.
O le afioga ia Lautimua o lea ua fa’amavae nei ma le tofiga Ofisa Sili o le Kamupani Va’a a Samoa i lona fa’amoemoe lea e tauva ai i le palota laitiiti a Vaimauga 3 mo se nofoa a lenei itumalo i le palemene.
Na avanoa le nofoa o le Vaimauga 3 i le Palemene ina ua tu’umalo le afioga ia Tapunuu Niko Lee Hang o le sa ia tauaveina le nofoa o le itumalo.
O Lautimu’ia ua iai le fa’amoemoe e tauva i lalo o le fa’amalu o le Fa’atuatua i le Atua Samoa ua Tasi e pei ona tula’i mai ai i le malo i le taimi nei.
O le Aso Faraile nei ua iai le fa’amoemoe o le’a tatalaina ai avanoa mo le fa’alauiloaina o sui tauva mo le faiga palota laitiiti a Vaimauga Numera 3.