20 Me 2022
O fa’amanuiaga ma i le ele’ele o se fua taualuga lea o fa’amanuiaga ua fa’amanuiaina ai le tama ia Ulugia Eneliko ma le faletua ia Brenda o Tapatapao.
Na maua le avanoa e faasoa ai nei au fai faatoaga i le BluTv Samoa, ma o lau fa’ailoa ai le tamaoaiga ma faamanuiaga ua mauaina ona o le galue ina o le laueleele.
I le amataga o le soifua finau o lenei ulugalii, na amata mai i le leai o se mea.
“Na amata mai le va ‘aiga le faatoaga taro, sa faatau ma ave i le makeki aua se seleni, e faigata le amataga o lenei atina’e ma i lona amataga. Ia silafia foi o ma’ua sa amata mai lava is e fa’asee sa o maua nonofo ai ma atinae ai lo ma aiga ma le fanau”.
O le ola finau o se tasi lea o molimau ola o lenei taumafaiga, e tele ni luitau ma faigata sa tauasa mai e Ulugia ma Brenda. O le fa’afitauli muamua ole tau sailia o ni fanua lelei e fetaui ma o la manao, ae peitai sa tali le Atua ma maua ai nai fasi fanua i Tapatapao lea na amata ai loa le faatoaga o taro i tausaga ua tuanai ao tau amata mai lo laua atinae.
“O maua na amata mai nao le ma taro a, ia faifai ua lelei ona saili lea o ni fatulaau mo fualaauaina. Ina ua maua mai lea o fatu fuala’auaina i lene taimi o le tamato. Ia ona taumafai foi lea ole toga tamato, sa matua lelei le ma taumafaiga, faasolo mai i tulaga o kapisi, kukama, ia oo mai taimi nei ua maua le tele o fualaau aina ua mafai ona ma totoina ma kiliva atu i le tele o faleoloa ma supamaketi o lo’o matou faipa’aga nei”.
O le faatoaga ma atinae a Ulugia ma Brenda sa tagi lava i lima mea e fai ai, e le’i iai ni tagata faigaluega sa fa’atinoina nei atinae, o le la fanau lava ma tamaiti a le aiga na fesoasoani e o’o mai i le taimi lenei ae o lo’o ave ai lava seleni tusa lava po’o a laua lava fanau.
Na ta’ua e Ulugia, o le taimi nei e lei leva ona iai se faiga pa’aga mase tasi o fa’alapotopotoga faatoaga I Nuu lea na fesoasoani atu i fale mo le kapisi, ae o lo’o taumafai ni talosaga mo ni fesoasoani mai i le malo e tauala atu i le matagaluega o Faatoaga ma Faigafaiva.
O le tulaga i maketi e pei ona faasoa ai le tina ia Brenda, o lo’o faamoemoe lava i o tatou lava tagata I faleoloa ma tagata taitoatasi. E leo iai ni maketi poo ni faitotoa mo atunuu e mamao.
Ua silia ma le 10 tausaga talu ona amata ina nei atinae o faatoaga e Ulgia ma le faletua, ma ua molimauina foi le faamanuiaina ini fale , taavale ma fanua ona o seleni na maua mai lava i le galueaina o le laueleele.
O le fautuaga a le alii faifaatoaga o fualaau aina ia Ulugia Eneliko, ina ia lalaga le laueleele aua o ina o lo’o pae ai le tele o seleni, ma o so’o se tagata e fia faatoaga ia lava le onosa i faafitauli. Aua ole galuega ma le galueaina o le laueleele e le’o se mea e faigofie. O le fa’amoemoe i le Atua e ala i le tatalo e manatu ma talitonu le alii fai fa’atoaga o le ki tatala lea o mea uma aemaise o ni atinae.
Ulugia Eneliko ma lona faletua o Brenda Senio.