Sola ma Siumu le siamupini o le ta’amilosaga ta’ito’afitu a le Marist Pago Flag Day 7’s.

Photo: Supplied by Marist St. Joseph's Pago

O le vaiaso na sei mavae atu nei sa auai atu ai nisi o kalapu lakapi ta’ito’a fitu a Upolu i le ta’amilosaga a le Marist St joseph’s Pago i Tutuila, o lenei ta’amilosaga o se tasi o ta’amilosaga e tulituli e le to’atele e le gata i kalapu lakapi eseese a upolu ma Savai’i fa’apea ai ma ‘au a Tutuila.

O le ta'amilosaga lenei o se tasi o vaega o ta'aloga mo le fa’amanatuina o le sisiga fu’a a le motu o Manu’a lea e fa’atinoina i le masina o Aperila i tausaga ta’itasi ma ua faaigoaina lenei ta’amilosaga ta’ito’afitu a le Marist Pago po'o le Governor Lemalu’s Cup e fa’atautaia i lalo o le fa’amalumaluga a le Marist St Joseph’s Pago.

E lua aso sa fa’agasolo ai le fa’atinoina o le ta’amilosaga, sa tatala aloaia ma amata ai ta’aloga o pulu i le aso muamua o le 26 ma fa’amaea ma tapuni aloaia ai i le aso 27 o le masina lenei o Aperila 2024.

O le 5 ai nei o tausaga talu ona amata mai lenei fa’amaite e ala i le fa’atinoina o se ta’amilosaga ta’ito’a fitu a le Marist St Jospeh’s Pago e pei o se fa’amoemoe e taualuga iai le sisiga fu’a a le motu o Manu’a.

O ‘au uma a Upolu sa saofaga atu ma saili ai se siamupini o lea fo’i ta’amilosaga e pei ona iai le ta’aloga i le va o kalapu lakapi e lua, sa ta’aalo ai le siamupini o le tausaga ua mavae le ‘au a le Marist St Joseph’s ma le ‘au a Siumu, na maea ta’aloga i le fa’ato’i lalo ai e Siumu o le ‘au malosi a le Marist St Joseph’s  i ‘ai e 12 i le 5. O se fiafiaga tele i ali’i ta’aalo aemaise ai le afioaga o Siumu le ausia ai o nei tulaga maualuga ona o se taimi muamua lenei ua avea ai le kalapu lakapi a Siumu ma siamupini o le ta’amilosaga o le Governor Lemalu’s Cup talu ona fa’avae mai.

E $13,000 Amerika le aofaiga atoa o le tino i tupe o le siamupini o lenei ta’amilosaga ma sa tau aao atu e le susuga ia Cherith Lober o le pule o le kamupani a le GHC Reid & Company, Ltd i le siamupini o lenei tausaga le kalapu lakapi a le afioaga o Siumu.  

Sa filifilia e le malo fa’aaloalogia o le ta’amilosaga(Guest of Honor) ia Lolo Lui le tama ta’aalo o le ta’amilosaga atoa ma filifilia ai le ali’i o Siaosi Asofolau mai le kalapu lakapi a Siumu, o se tasi o sui filifilia o le Manu Samoa 7’s ma ta’aalo ai i le tele o tausaga.