23 Aukuso 2023: O le sa 'avea muamua ma Minisita o le Kapeneta i le malo o Niu Sila le afioga ia Aupito William Sio sa faia sana saunoaga fa'ai'i aloa'ia e fa'amavae mai ai ma le Palemene i le afiafi o le Aso Lua 22 o Aukuso 2023 i le maota fono a Niu Sila.
Na maofa tagata ina ua savali mai le afioga ia Aupito, ua leai se ofu i lona tino, o teuga fa'aSamoa, tuiga ma lona sulugatiti o le 'ie Samoa ae e fa'aaliali lana tatau.
Sa fa'age'etia ia sui mamalu uma o le palemene o Niu Sila aemaise o ona 'aiga ma sui o le malo o Samoa i Aotearoa ona o le pele ia Su'a o lana aganu'u.
Na saunoa Aupito, o lona la'eiina ai o la'ei ma teuga a Samoa, o lana lea fa'aaloalo i tagata Pasefika ma ona ta'ita'i sa o latou lagolagoina ia a'o tula'i mai i le tofi Minisita.
O le manatu ma le fe'au autu o lana lauga fa'amavae sa taula'i lava i le lumana'i o tagata Pasefika o Aotearoa, o fa'amoemoega ma miti o tupulaga Pasefika aemaise o lu'itau e ono feagai ma so'o se isi ua mana'o e tautua le malo o Niu Sila.
O Aupito o le tasi o Sui Faipule umi i totonu o faiga upufai o malo a Niu Sila lea ua silia ma le 22 tausaga o tautua pea.
Na momoli lana fa'afetai i le Palemia o Niu Sila ua iai i le taimi nei ia Chris Hipkins ona o lona lagolagoina lea o atumotu Pasefika aemasie ai lava o mata'upu i galuega, fa'amanuiaga ma tulaga tau i le Soifua Maloloina.